'जावा सम्राट' श्री. बबनराव दीक्षित
- धनंजय वसंत मेहेंदळे, पुणे
मध्यंतरी 'जावा' या गेल्या पिढीतील गाडीचं भारतीय बाजारपेठेत पुनरागमन झालं. अनेक जुने 'जावा'प्रेमी आणि आजच्या पिढीतील अनेक तरुण या गाडीच्या येण्याची वाट बघत होते.
जुन्या जावा गाडया आजकाल पाहायला मिळणं, तसं अवघड आहे; पण पुण्यातील आमचे जावा संग्राहक मित्र श्री. बबनराव दीक्षित यांच्यामुळे जवळपास सत्तर वर्षांपूर्वीच्याही गाड्या बघायला मिळतात. केवळ जावाच नाही; तर इतर बनावटीच्या व्हीन्टेज दुचाकीही त्यांच्या संग्रहात आहेत.
स्वतःच्या गॅरेजचा व्याप सांभाळून बबनरावांनी आपला हा छंद जोपासला आहे. केवळ संग्रह करणंच नव्हे, तर या गाड्यांची खडानखडा माहिती असल्याने, गाडीचा एखादा पार्ट मिळत नसल्यास स्वतः तो पार्ट तयार करून घेतात.
त्यांचे चिरंजीव श्री. सुहास दादा हे ही या कामात निष्णात आहेत.
साधारणपणे 15 जावा, 10 इतर बनावटीच्या गाड्या असा जवळपास 25 व्हीन्टेज गाड्यांचा ताफा वयाच्या 80व्या वर्षीदेखील बबनराव उत्साहाने सांभाळतात.
एवढंच नाही, तर विंटेज रॅलीमध्ये त्यांच्या ताफ्यातल्या वेगवेगळ्या गाड्या चालवून दीक्षित पिता- पुत्र प्रथम क्रमांक मिळवणारच.
त्यांच्या या जावा प्रेमावर अनेक इंग्रजी- मराठी वृत्तपत्रात विविध लेख छापून आले आहेत.
आता नवीन जावा लॉंचिंगच्या वेळी कंपनीने काढलेल्या खास पुस्तकातही त्यांची मुलाखत, फोटो छापले आहेत.
बबनराव, सुहास दादा यांच्याबरोबर आता तिसरी पिढीही (सुहास दादांची कन्या) यात तयार होत आहे.
बबनरावांसारख्या रसिक संग्राहकांमुळेच आमच्या आणि पुढच्या पिढीला हा दुर्मीळ खजाना पाहायला मिळतो...
सध्याचा कोविड काळ आणि वय 80... यामुळे बबनराव भेटू शकत नाहीत.
No comments:
Post a Comment